Sommarskift

I dag har A. bytta klede 4 gonger.

1. Den første buksa vart våt av tiss.
2. På med kjole og strømpebukse. Like etter hadde ho tømt ein kopp med vatn utover strømpebuksa.
3. På med ny strømpebukse. Jordbær og is i parken med tante S. og onkel F. Is og jordbær på alle kleda (naturleg nok).
4. Shorts og t-skjorte. T-skjorta klarte seg faktisk ut dagen, men shortsen må på vask…

Godt det er god klestørk for tida.

Sportskjendisnytt

I dag har eg først vore på kafé med ein av Brann-spelarane som skåra mål i kampen mot Molde i går (trur eg i alle fall, verken Lene eller eg er spesielt gode på fotballspelarar). Deretter symde eg med han som vann OL-medalje i symjing for ikkje så lenge sidan. Han symde nok litt fortare enn meg, men han hadde symjebriller, og det hadde ikkje eg.

Ut på tur, litt sur

Vi har vore i utlandet, nærare bestemt i Sverige. På veg heim hadde A. og eg eit par dagar i Oslo, før vi skulle ta toget frå Oslo til Bergen. På grunn av utanlandsopphaldet hadde eg veldig vondt i ein fot, og difor bestemte eg meg for å ta taxi til togstasjonen på Lysaker. På GuleSider skulle det vere ca 8 km frå der vi overnatta. For å vere på den sikre sida bestilte eg likevel taxien 50 min før toget skulle gå. Det ville jo vere kjipt å bli sitjande fast i morgontrafikken og ikkje rekke toget.

For å gjere ei frykteleg lang historie kort: Vi hamna på Lillestrøm i staden for på Lysaker.

Vi rakk sjølvsagt ikkje toget, men fekk køyre taxi i 130 km/t til Gardermoen i staden. No har eg send klagebrev til taxi-selskapet og håpar at dei betalar flybilletten vår heim att.

Helga i tal

På tide med ei oppsummering av helga. Og etter å ha lese ei spanande bok, der matematikk spelte ei fiffig birolle, har eg funne ut at eg vil ha eit lite statistisk tilbakeblikk:

Antal barn eg har hatt ansvar for: 1
Antal timar søvn: 6 + 6 + 2,5 (slett ikkje verst!)
Antal sider lese i spanande bok: ca 500
Antal sider skrive på eksamensoppgåva: 1,5
Antal liter konsumert koffeinhaldig drikke: ca 2,5
Antal pakkar med brukt Kleenex: ca 5 (talet vil nok auke før helga er over)

Nye erfaringar

Ja, då kan vi krysse av på endå ei “før-eller-seinare-må-det-skje-hending.” Denne gongen ikkje like lystbetont som førre gong, for i dag handla det om bilsjuke. Eg reknar med at det ikkje er naudsynt med ytterlegare detaljar eller dokumentasjon. Men ikkje så gale at det ikkje er godt for noko: pappa, som var sjåfør på turen (og som ikkje er kjend for å ta det roleg i svingane), fann ein 20-kroning på bakken der vi stoppa bilen. For ein flaskesamlar er dette stort.

Kjøkkenkjemi/ fysikkens lover

Eg må innrømme at eg har venta på det. Før eller seinare måtte det berre skje, og i dag var altså dagen. Men at det skulle bli to gonger på same dag, hadde eg ikkje rekna med.

A. veks i alder og visdom, og har funne ut at boksar og posar ofte har eit innhald (nei, ho får ikkje leike med plastposar over hovudet, for dei som trudde det). I dag sat eg i stova og ante fred og ingen fare, medan A. kosa seg med å utforske kjøkenskapa. Det gjer ho stadig vekk, og det har gått greitt – til no. Brått kjende eg lukta av kakaopulver spreie seg i huset. Her måtte det vere noko muffens (dessverre ikkje muffins, til trass for den sterke kakaolukta). Og ganske riktig. A. hadde fått tak i ein boks med eit veldig spanande innhald. Bileta talar for seg sjølv.

Litt seinare på dagen fekk ho tak i ein annan pose som har ligge trygt i skapet – til no. Det vart litt sånn bryllupsstemning ei lita stund, men det gjekk fort over. Eg måtte fram med støvsugaren nok ein gong. Kor skal dette ende?

Testbilete/ luring

Hipp hurra for meg sjølv!

Eg har bursdag. Eg får ikkje sove. Sidan kl 0330 har eg vore vaken. No er klokka snart 06. Ein skulle kanskje tru at det har med det travle småbarnslivet å gjere, men nei. A. søv søtt i senga si (mest truleg liggjande oppå dyna med hovudet i fotenden). Ikkje er det tanken på bursdagsgåvene heller. Utruleg, men heilt sant. Ikkje misforstå – eg gler meg til å opne dei, altså. Men eg har ikkje den velkjende det-kriblar-sånn-i-kroppen-etter-gåver-får-ikkje-sove-kjensla. Kanskje er det østersen eg åt på restaurant i går kveld som framleis lever i magen min, og som ønskjer å halde fest med meg? Ikkje veit eg. Uansett er det frustrerande å ikkje få sove. Godt ein har Internett. Og ein mann som har fri, og som kan stelle og stulle med kone og barn resten av dagen…

Ein sovande pappa klarar å utkonkurrere datamaskina

I går. H. sov på sofaen, heilt utslitt etter ein føremiddag med barnet. A. leika på golvet. Eg sette meg i godstolen og tok fram datamaskina. A. kom pilande bort og ville trykke på knappane. Så oppdaga ho H. på sofaen, smilte eit lurt smil, og krabba bort til han i full fart. Vel framme ved sofaen lo ho, og byrja å pirke pappaen i nasen og munnen. H. søv godt, så han snudde berre det andre kinnet til, slik at A. kunne dra han i øyret, framleis medan ho lo, ein litt lur latter.

Så då har vi altså funne ut kva ho likar betre enn datamaskina: ein sovande pappa på sofaen.

Lite blogging, men mykje aktivitet

A. diggar datamaskina. Før kunne eg surfe på nettet og den slags medan A. leika på golvet. No kjem ho krabbande i full fart så snart ho skjønar at datamaskina er på. Ho er veldig glad i å trykke på knappane, så det er vanskeleg å få gjort noko data-aktig når ho er i nærleiken. Eg har prøvd å flytte maskina opp på eit bord som ho ikkje når opp til, men prøv å gjere noko fornuftig med ei lita jente som kjem krabbande under bordet og prøver å klatre opp på fanget ditt!

Og når A. har lagt seg, og eg har rydda huset og hengt opp klede er eg så utslitt at det einaste eg orkar å gjere er å sjå på søppel-TV…

PS: Lurer du på korleis eg har klart å skrive dette nokså lange innlegget på eit tidspunkt der A. er vaken? Eg har lokka ho til å sjå på TV. Drømmehagen på NRK Super gir meg opp mot ein halvtime “fri” kvar dag…